परम्परागत सीप हस्तान्तरणका लागि बिद्यार्थीलाई दुना टपरी बुन्ने तालिम

गोरखा नगरपालिका–९ लक्ष्मीबजारस्थित द्रव्यशाह बहुमुखी क्याम्पसका छात्राहरुलाई दुना टपरी बुन्ने तालिम प्रदान गरिएको छ । दुना टपरी बुन्ने परम्परागत सीपलाई पुस्ता हस्तान्तरण गर्ने उदेश्यले तालिम संचालन गरिएको क्याम्पसले जनाएको छ ।

सालको पातबाट दुना, टपरी र बोगता वुन्न सिकाइएको क्याम्पस प्रमुख एकदेव अधिकारीले बताए । ‘मौलिक परम्परा र संकृति जर्गेनासँगै परम्परागत सीप युवापुस्तामा हस्तान्तरण गर्ने उदेश्य हो,’ उनले भने, ‘यो सीप बिद्यार्थीहरुका लागि आर्थिक उपार्जनको माध्यम पनि बन्न सक्छ ।’

पछिल्लो समय बढ्दै गएको प्लाष्टिकका थाल र कचौराको प्रयोगलाई स्थानीय स्रोत साधनबाट निरुत्साहित गर्न पनि तालिमले सहयोग पुग्ने उनको अपेक्षा छ ।

क्याम्पसको सिकौ र सिकाऔ भन्ने अभियान अन्तरगत तालिम प्रदान गरिएको बताइएको छ । अतिरिक्त क्रियाकलापमा छात्राहरुले कम सहभागीता जनाउने भएकाले उनीहरुलाई लक्षित गरी तालिम आयोजना गरिएको क्याम्पस प्रमुख अधिकारीले बताए । तालिम पश्चात उनीहरुबीच दुना टपरी बुन्ने प्रतियोगिता समेत गर्ने तयारी भइरहेको उनले जानकारी दिए ।

तालिममा दुना टपरी बनाउने सीप हासिल गरेको छात्राहरुको भनाइ छ । ‘यसअघि टपरी भन्ने मात्र सुनेको थिए, दुना र बोगता भन्ने थाहा थिएन,’ छात्रा जोविना तामाङले भनिन्, ‘आज थाहा भयो, बनाउन पनि सिकियो ।’

तालिममा मिरा पुडासैनी र क्याम्पसका शिक्षकहरुले सहजिकरण गरेका थिए ।